Allah ki Rahmat

ALLAH KI RAHMAT

زندگی واقعی ہزار رنگ روپ رکھتی ہے 

اس میں سچائی کا سنہرا رنگ بھی ہے تو جھوٹ کا گدلا پن بھی 

نیکی کی روپہلی کرنیں بھی ہیں تو بدی کی تاریکی بھی 

امن کی سفیدی بھی ہے تو ظلم کی سیاہی بھی 

رحمت کا سبزہ بھی ہے تو زحمت کے سلیٹی بادل بھی 

سمندروں سی نیلاہٹ بھی ہے تو مٹی کا خاکی رنگ بھی 

خون دل کی سرخی بھی ہے تو دل خون کر دینے والوں

کے چہرے کی پیلاہٹ بھی 

آنکھیں ہیں ویران اور پر درد چہرہ 

خون جل جل کے ہوا رنگ زرد میرا 

وارثی وجاہت

مگر ہر رنگ ہمیں ایک نیا سبق دیتا ہے سوچنے کی ایک نئی راہ دکھاتا ہے 

سب سے بہترین اور بنیادی رنگ الله کی رحمت کا ہے وہ رحمت جو مسلسل ہمارے ساتھ ہے جو دکھائی نہیں دیتی مگر ہمیشہ سایا فگن رہتی ہے ہم گناہ گاروں پر 

لوگ کہتے ہیں کہ سایا تیرے پیکر کا نہ تھا 

میں یہ کہتا ہوں جہاں بھر پہ ہے سایا تیرا 

وہ رحمت جسے الله نے رحمت اللعالمین کی صورت میں مجسم کر دیا 

سو جو درودوں کی چھاؤں میں رہتے ہیں انہیں کسی دھوپ کا خوف نہیں ہوتا 

اور جن کی راتیں اس محبوب کی یادوں سے روشن رہتی ہوں انہیں کسی تاریکی کی کیا پرواہ! 

سبھی کچھ اس کے لیے آسان ہے جو ہر اچھائی اور برائی کو الله کی رضا سمجھ کر دل سے تسلیم کرے اور اپنا سبھی کچھ اس محترم ذات محمد صلی الله علیہ وسلم کا صدقہ سمجھے تو کوئی مشکل مشکل نہیں کوئی دشواری دشواری نہیں 

اور ادراک کر لینے والوں کو راہ میں اٹھنے والا ہر قدم منزل سے قریب تر ہی کرتا ہے